വിഴിഞ്ഞം തീരമണഞ്ഞ് എംഎസ്സി മിയ; ഏഷ്യയെയും യൂറോപ്പിനെയും ബന്ധിപ്പിക്കുന്ന ജേഡ് സർവീസിലുൾപ്പെട്ട ആദ്യ കപ്പൽ
ഏഷ്യയെയും യൂറോപ്പിനെയും ബന്ധിപ്പിക്കുന്ന ജേഡ് സർവീസിന്റെ ഭാഗമായ ആദ്യ കപ്പൽ എംഎസ്സി മിയ ഇന്നലെ പുലർച്ചെ ബെർത്തിൽ അണഞ്ഞു. വിഴിഞ്ഞത്തേക്കു വരുന്ന ജേഡ് സർവീസിലുൾപ്പെട്ട രണ്ടാമത്തെ കപ്പൽ എംഎസ്സി മിർജാം ഇന്ന് ബെർത്തിലെത്തും. രണ്ടു ദിവസം മുൻപ് പുറംകടലിൽ നങ്കൂരമിട്ടിരുന്ന എംഎസ്സി മിയ ബെർത്ത് ഒഴിവു ലഭിക്കാത്തതിനെ തുടർന്നാണ് അടുക്കാൻ വൈകിയത്.
കഴിഞ്ഞ ദിവസം പുലർച്ചെ 2.25ന് മലയാളി ക്യാപ്റ്റൻ നിർമൽ സക്കറിയ ആണ് മിയയെ ബെർത്തിലേക്ക് എത്തിച്ചത്. ഇരുപതിനായിരത്തിലേറെ കണ്ടെയ്നറുകളുമായി വിഴിഞ്ഞത്തെത്തിയ കപ്പലിൽ നിന്നു മൂവായിരത്തോളം കണ്ടെയ്നറുകളുടെ നീക്കം നടക്കും.
