കായംകുളം ബി.എസ്.എന്‍.എല്‍ ഓഫീസിലെ ടവറിന് മുകളില്‍ പെട്രോൾ നിറച്ച കുപ്പിയുമായി കയറി അത്മഹത്യ ഭീഷണി മുഴക്കുകയും തുടര്‍ന്ന് ടവറിലുണ്ടായിരുന്ന കടല്‍കൂട്ടത്തിന്റെ കുത്തേറ്റ് പരിക്കേല്‍ക്കുകയും ചെയ്ത യുവതിയുടെ നില ഗുരുതരം. ഇന്നലെ വൈകിട്ട് നടന്ന സംഭവം വൺ ഫോർട്ടി ന്യൂസ് ന്യൂസ് റിപ്പോർട്ട് ചെയ്തിരുന്നു. ടവറിൽ കയറിയ യുവതിയെ പിൻതിരിപ്പിക്കാൻ ഫയർഫോഴ്സും പോലീസും നാട്ടുകാരും ശ്രമം നടത്തിയെങ്കിലും ടവറിന്റെ കൂടുതൽ ഉയരത്തിലേക്ക് ഇവർ കയറുകയായിരുന്നു. ഇതിനിടെയാണ് കടന്നൽ കൂട് ഇളകി യുവതിയെ കൂട്ടത്തോടെ ആക്രമിക്കുകയായിരുന്നു.
തമിഴ്‌നാട് വില്ലുപുരം മേട്ടു സ്ട്രീറ്റില്‍ വിജയ് മണിയുടെ ഭാര്യ അമ്പുറോസി (23)യാണ് കുറ്റന്‍ ടവറിന് മുകളില്‍ കയറി ആത്മഹത്യാ ഭീഷണി മുഴക്കിയത്. ഇവരെ കോട്ടയം മെഡിക്കല്‍ കോളജ് ആശുപത്രിയുടെ തീവ്രപരിചരണ വിഭാഗത്തിലേക്ക് മാറ്റി. ഭർത്താവിനോടൊപ്പമുള്ള കുഞ്ഞിനെ തിരികെ കിട്ടാത്തതിനാൽ ആത്മഹത്യ ചെയ്യുമെന്ന് യുവതി ഭീഷണി മുഴക്കിയതോടെ ജീവനക്കാർ പോലീസിനെയും അഗ്നിരക്ഷാസേനയെയും വിവരം അറിയിക്കുകയായിരുന്നു. യുവതിയെ പിന്തിരിപ്പിക്കാന്‍ പലതവണ ശ്രമിച്ചെങ്കിലും വഴങ്ങാതെ വന്നതോടെ അഗ്നിരക്ഷാസേനാംഗങ്ങൾ ടവറിനു ചുറ്റും വലവിരിച്ചു മുൻകരുതലെടുത്തു. പോലീസ് ഉദ്യോഗസ്ഥർ അനുനയിപ്പിക്കാനുള്ള ശ്രമം തുടരുന്നതിനിടെ യുവതിയുടെ കൈവശമുണ്ടായിരുന്ന പെട്രോൾ നിറച്ച കുപ്പി താഴെ വീണു. ഇതോടെ ടവറിന്റെ കൂടുതൽ ഉയരത്തിലേക്കു യുവതി കയറാൻ തുടങ്ങി.
മുകളില്‍ കടന്നല്‍ക്കൂട്ടമുണ്ടെന്ന് പോലീസ് മുന്നറിയിപ്പ് നൽകിയെങ്കിലും യുവതി ഇത് കേള്‍ക്കാന്‍ കൂട്ടാക്കിയില്ല. ഈ സമയം കടന്നൽക്കൂട്ടം ഇളകി യുവതിയെ ആക്രമിച്ചതോടെ യുവതി സ്വയം താഴേക്കിറങ്ങി. തുടർന്ന് പ്രഥമശുശ്രൂഷ നൽകിയശേഷം ആശുപത്രിയിൽ എത്തിച്ചു. ഭർത്താവുമായി വഴക്കിട്ട് കുഞ്ഞുമായി വീടു വിട്ട യുവതി ആദ്യം തിരൂരിൽ സഹോദരിയുടെ വീട്ടിലാണ് എത്തിയത്. ഭർത്താവ് അവിടെയെത്തി മർദിച്ചശേഷം കുട്ടിയെ തട്ടിയെടുക്കുകയായിരുന്നുവെന്നു യുവതി പരാതിയിൽ പറയുന്നു. തിരൂരിൽ നിന്ന് ചാരുംമൂട് പുതുപ്പള്ളിക്കുന്നത്തുള്ള സുഹൃത്തിന്റെ വീട്ടിൽ എത്തിയ ശേഷമാണ് കായംകുളത്ത് വന്ന് ആത്മഹത്യാ ശ്രമം നടത്തിയത്. തിരൂർ പോലീസിൽ പരാതി നൽകിയിട്ടും നടപടി സ്വീകരിച്ചില്ലെന്നും ആരോപണമുണ്ട്.
About the Author
