തിരുവനന്തപുരം: നിരവധി ലഹരി കടത്തുകേസുകളിലെ പ്രതിയെ കഞ്ചാവും ഹാഷിഷ് ഓയിലും നാടന്‍ തോക്കുമായി പൊലീസ് പിടികൂടി. നിരവധി തവണ ലഹരി കടത്ത് കേസില്‍ പിടിക്കപ്പെട്ട വെഞ്ഞാറമൂട് കോട്ടുകുന്നം ഇടവം പറമ്പ് വൃന്ദാവനത്തില്‍ ചന്തു എന്ന് വിളിക്കുന്ന ദിലീപിനെയാണ് (40) വെഞ്ഞാറമൂട്ടിലെ വീട്ടില്‍ നിന്ന് പിടികൂടിയത്.1200 ഗ്രാം കഞ്ചാവ്, 6 ചെറിയ ബോട്ടില്‍ ഹാഷിഷ് ഓയില്‍, നാടന്‍ തോക്ക്, 6 നാടന്‍ ബോംബ്, കാട്ടുപന്നിയുടെ തലയോട്ടി, കാട്ടുപന്നിയുടെ നെയ്യ്, പെരുമ്പാമ്പിന്‍റെ നെയ്യ്, നാല് ലക്ഷത്തോളം രൂപ എന്നിവയാണ് പോലീസ് ഇയാളുടെ വീട്ടില്‍ നിന്ന് പിടിച്ചെടുത്തത്.സംസ്ഥാനത്തെ വലിയ തോതിലുള്ള മയക്കുമരുന്ന് വിപണനമാണ് ഇയാള്‍ നടത്തിയിരുന്നത്. സ്‌കൂള്‍ – കോളജ് വിദ്യാര്‍ഥികള്‍ ഉള്‍പ്പെടെ ഇയാളുടെ ഇടപാടുകാരാണ്. സംഭവവുമായി ബന്ധപ്പെട്ട് ദിലീപിന്‍റെ ഭാര്യ പ്രഭുല്ലയെയും (32) പോലീസ് പ്രതിയാക്കി കേസെടുത്തിട്ടുണ്ട്. ഭാര്യയാണ് വീട്ടില്‍ ചില്ലറ വിപണനം നടത്തിയിരുന്നത്.വീട്ടിലേക്ക് ആരും കടന്നുചെല്ലാത്ത രീതിയില്‍ പത്തോളം നായ്ക്കളെയാണ് വളര്‍ത്തുന്നത്. നിരവധി മയക്കുമരുന്ന് വിപണന കേസുകളില്‍ മുന്നേയും ദിലീപ് പിടിക്കപ്പെട്ടിട്ടുണ്ട്. യോദ്ധാവ് പദ്ധതിയുടെ ഭാഗമായി ലഭിച്ച രഹസ്യ വിവരം റൂറല്‍ എസ് പി ഡാന്‍സാഫ് ടീം ഡിവൈഎസ്പി രാസിത്തിനു കൈമാറുകയും തുടര്‍ന്ന് ആറ്റിങ്ങല്‍ ഡിവൈഎസ്പിയുടെയും നേതൃത്വത്തില്‍ വെഞ്ഞാറമൂട് സര്‍ക്കിള്‍ ഇന്സ്പെക്ടര് സൈജു നാഥ്, സബ് ഇന്‍സ്‌പെക്ടര്‍മാരായ മനോജ്, ശശിധരന്‍ നായര്‍, ഡാന്‍സ് ടീം സബ് ഇന്‍സ്‌പെക്ടര്‍മാരായ ബിജുഹക്ക്, അസിസ്റ്റന്റ് സബ് ഇന്സ്പെക്ടര് സജു, സി,പി,ഒ മാരായ ഷിജു ഉമേഷ് ബാബു,വിനീഷ് സുനില്‍രാജ്, വനിതാ പോലീസ് ഓഫീസര്‍ സ്റ്റെഫി തുടങ്ങിയവര്‍ ചേര്‍ന്നാണ് പ്രതിയെ അറസ്റ്റ് ചെയ്തത്
About the Author
