തിരുവനന്തപുരം: അർബുദത്തോട് പട വെട്ടി ജീവിതത്തിലേക്ക് തിരികെയെത്തുന്ന അനേകായിരങ്ങൾക്ക് ആശ്വാസമേകുന്ന ഡോക്ടർ മണ്ണിനെ ചികിത്സിച്ചപ്പോൾ വിരിഞ്ഞത് നൂറു മേനി വിളവ്. തിരുവനന്തപുരം ജില്ലയിൽ പുളിമാത്ത് പ്ലാവോട് പാടശേഖരത്തിലായിരുന്നു ഈ നെൽകൃഷിയും അപൂർവ്വ കൊയ്ത്തുത്സവവും. ആതുര സേവന രംഗത്തെ തിരക്കിനിടയിലും ജൈവ കൃഷിയിലൂടെ നെല്ലുൽപാദനത്തിൽ നൂറുമേനി കൊയ്‌തെടുത്ത ഡോക്ടർമാർ നാടിനും നാട്ടുകാർക്കും കൗതുക കാഴ്ചയായി. കർഷകർ പോലും കൃഷി ഉപേക്ഷിച്ചു മറ്റു ജീവിത മാർഗം തേടുമ്പോഴാണ് തിരുവനന്തപുരം ആർ.സി.സിയിലെ അഡീഷണൽ ഡയറക്ടർ ഡോ. സജീദ് തന്റെ കൃഷിയിടത്തിലേക്കു ഇറങ്ങി മണ്ണിൽ കനകം വിളയിച്ചത്. നാളെയുടെ നിലനിൽപ്പിന് തന്നെ പാടശേഖരങ്ങളുടെ സംരക്ഷണം അനിവാര്യമാണെന്നും പുതുതലമുറയെ ജൈവ കൃഷി പ്രോൽസാഹിപ്പിക്കുകയെന്ന ലക്ഷ്യവുമുണ്ടായിരുന്നു ഡോ. സജീദിന്.40 ഏക്കറോളം വരുന്ന പാടശേഖരത്തിൽ തനിക്കുള്ള ഒന്നര ഏക്കറിൽ ആണ് ഡോക്ടർ നെല്ല് വിതച്ചത്. ആശുപത്രിയിലെ തിരക്കുകൾക്ക് ഇടയിലും കൃഷിക്കായി സമയം മാറ്റി വെച്ച ഡോക്ടറെ മണ്ണും ചതിച്ചില്ല. നൂറു മേനി വിളവ് നൽകി ഭൂമി ഡോക്ടറെ അനുഗ്രഹച്ചു. കൊയ്‌തെടുക്കാൻ ആളെ തേടിയെങ്കിലും കിട്ടാതെ വന്നു. ആശുപത്രിയിൽ നിരവധി അതിസങ്കീർണ്ണമായ പ്രശ്‌നങ്ങളെ തരണം ചെയ്ത ഡോക്ടർ മറ്റൊന്നും ചിന്തിച്ചില്ല സുഹൃത്തുക്കളോട് പ്രശ്‌നം ചർച്ച ചെയ്തു. പിന്നെ എല്ലാം പെട്ടെന്നായിരുന്നു. സഹപാഠികളും കൂട്ടുകാരുമായ ആരോഗ്യ മേഖലയിലെ ഉന്നതസ്ഥാനീയരായ പ്രമുഖ ഡോക്ടർമാർ പാടത്ത് ഇറങ്ങാമെന്ന് ഉറപ്പ് നൽകി.മെഡിക്കൽ കോളേജയിലെ ഓർത്തോ വിഭാഗം അസിസ്റ്റന്റ് പ്രഫസർ ഡോക്ടർ ബിനോയ്, കാർഡിയോളജി വിഭാഗം അസി. പ്രഫസർ ബൈജു, തിരുവനന്തപുരം റെയിൽവെ ഡിവിഷനിലെ ഡോ. വി.വി. അജിത് കുമാർ കോസ്‌മോ ആശുപത്രി സൂപ്രണ്ട് ഡോ. മധു, കടക്കൽ ഗവണ്മെന്റ് ഹോസ്പിറ്റലിയിലെ ഗൈനക്കോളജിസ്റ്റ് ഡോ. ആഷ.ജെ.ബാബു എന്നീ ഡോക്ടർമാരും കുടുംബാംഗങ്ങളുമാണ് പാടത്തു ഇറങ്ങി നെല്ല് കൊയ്തത്.പരമ്പരാഗത കൊയ്ത്തു പാട്ടുകൾ പാടിയും കൃഷി ഇടത്തിൽ ഒന്നിച്ചു ഇരുന്നു ഭക്ഷണം കഴിച്ചുമാണ് കൊയ്ത്തു ദിനം ഇവർ ആഘോഷമാക്കിയത്. രാസവളങ്ങളുടെയും കീടനാശിനികളുടെയും അമിത ഉപയോഗം മൂലം മനുഷ്യരിലുണ്ടാകുന്ന മാരകരോഗങ്ങൾക്ക് ശാന്തി പകരാൻ നിയോഗിയ്ക്കപ്പെട്ടവർക്ക് ജൈവ നെൽകൃഷിയും അന്യമല്ലന്ന് ഇതിലൂടെ തെളിയിച്ചു. കർഷകർ ചിലവ് കുറഞ്ഞ ജൈവ കൃഷി മാതൃകയാക്കി നെൽകൃഷിയിലേയ്ക്ക് തിരിയണമെന്നും ഡോക്ടർമാർ പറഞ്ഞു.
About the Author
