നിർത്തിയിട്ട ഇലക്ട്രിക് സ്കൂട്ടർ കത്തിനശിച്ചു

നെയ്യാറ്റിൻകര : അതിയന്നൂർ പഞ്ചായത്ത് ഓഫിസ് വളപ്പിൽ ഇലക്ട്രിക് സ്കൂട്ടർ അഗ്നിക്കിരയായി. കൊടങ്ങാവിള ചെമ്പനാവിള കാരുണ്യ ഭവനിൽ ഷിബിൻ രാജിന്റെ സ്കൂട്ടറാണ് ഇന്നലെ രാവിലെ പതിനൊന്നോടെ കത്തിയത്. പഞ്ചായത്ത് ഓഫിസിൽ ഒരു സർട്ടിഫിക്കറ്റിനു വേണ്ടി എത്തിയതായിരുന്നു ഷിബിൻ. പാർക്ക് ചെയ്ത് ഓഫിസിനുള്ളിൽ പ്രവേശിക്കുന്നതിനിടെ സ്കൂട്ടർ കത്തുകയായിരുന്നു. അഗ്നിരക്ഷാ സേനാ വിഭാഗം എത്തുന്നതിനു മുൻപു തന്നെ നാട്ടുകാരുടെ സഹായത്തോടെ തീ അണച്ചു. സ്കൂട്ടർ അഗ്നിക്കിരയാകാനുള്ള കാരണം വ്യക്തമല്ല.