നെടുമങ്ങാട്: നഗരദുരന്തലഘൂകരണത്തിനായി ആക്കുളം കായലും പരിസരവും സംരക്ഷിക്കുകയും വാഹകശേഷി വർദ്ധിപ്പിച്ചു നിലനിർത്തുകയും വേണമെന്ന് കേരള ശാസ്ത്രസാഹിത്യപരിഷത്ത് തിരുവനന്തപുരം ജില്ലാസമ്മേളനം സർക്കാരിനോട് ആവശ്യപ്പെട്ടു. സംസ്ഥാനാന്തരകനാലായ എവിഎം കനാലിന്റെ കേരളത്തിലുള്ള ഭാഗത്തിന്റെ പുനരുദ്ധാരണം കേന്ദ്രസർക്കാർ ഉപേക്ഷിച്ച സാഹചര്യത്തിൽ സംസ്ഥാനസർക്കാർ ഏറ്റെടുക്കണമെന്നും ജില്ലയുടെ കിഴക്കൻ വനമേഖലകളിൽ ഏകവിളത്തോട്ടങ്ങൾ പുനഃസ്ഥാപിക്കാനുള്ള നീക്കം വനം വകുപ്പ് ഉപേക്ഷിക്കണമെന്നും നെടുമങ്ങാട്ടു നടന്ന രണ്ടുദിവസത്തെ സമ്മേളനം വ്യത്യസ്തപ്രമേയങ്ങളിൽ ആവശ്യപ്പെട്ടു.
ആക്കുളം കായലിന്റെ വിസ്തൃതി 1950-കളിലെ 245-നിന്ന് 145 ഏക്കറായി കുറഞ്ഞിരിക്കുന്നു. വലിയതോതിൽ ജൈവ, അജൈവ മാലിന്യങ്ങൾ എത്തിക്കൊണ്ടിരിക്കുന്നു. ജലത്തിന്റെ ഗുണനിലവാരം കുറഞ്ഞ് ആവാസവ്യവസ്ഥ തകർന്നിരിക്കുന്നു. കാർബൺ-നൈട്രജൻ അനുപാതം ക്രമാതീതമായി ഉയർന്നത് സസ്യജാലവളർച്ച കൂട്ടുകയും ഗതാഗതം തടയുകയും ചെയ്തിരിക്കുന്നു. കാലാവസ്ഥാവ്യതിയാനത്തിന്റെ ഭാഗമായ അതിതീവ്രമഴ അടിക്കടി നഗരകേന്ദ്രിത വെള്ളപ്പൊക്കം സൃഷ്ടിക്കുന്നു. ഇതെല്ലാം കൂടുതൽ രൂക്ഷമാകുന്നതു പരിഗണിച്ചാണ് ആക്കുളം കായൽ സുസ്ഥിരമായി സംരക്ഷിക്കണമെന്ന് പരിഷത്ത് ആവശ്യപ്പെടുന്നത്.
About the Author
